دولوب محببتون اي شوخ و دلستان ديليمه

آليب قراريمي الدن وئريب توان ديليمه

كمان قاشون، گؤزون، اوخ كيپريگون، ساچين گؤزه ليم

آتير كمند، چكير ياي گئدير نشان ديليمه

آلاولي سينه مين آهي وجوديمي كول ائدر

اگر سو سپمسه بو چشم خونفشان ديليمه

يوخومدو چاره داياننام هميشه چم خميوه

ولي باتيرمياسان طعنيله تيكان ديليمه

گتير جماليوي قوي سينمه قادان جانيما

سرين سرين نفسونله سو سپ يانان ديليمه

نه قدري گيزله ديرم درد عشقي سينه مده

ديليمده جوشه گلير غم اولور روان ديليمه

مي الستله مستم نه آبدستله پست

كي دگمه ييب اليمه جام و استكان ديليمه

آنا ديليم ائله شيريندي جاندان ايسته ملي

آچاندا من ديل آنام چوخ دئييبدي جان ديليمه

ديليم شيريندي عسلدن اودور كي غم يئمه رم

اگر وورا آريلار نيش هر زامان ديليمه

منم او ترك، كي آديم غزللرين دوزودو

من آذر اوغلويام آذر وئريبدي جان ديليمه

منم او ترك، بخارئيله سمرقندي

باغيشلاييبلا قرا خاليمه ماتان ديليمه

منم او ترك، كي غربتده اللي ايل ياشارام

تجاوز ائيله مز اهواز و اصفهان ديليمه

منم او ترك، كي دالدان چيخاردارام ديليني

قاهاررام انگيني هر كيم ديسه يامان ديليمه

منم او ترك، سوزوم جمله سوزلرين گوزيدو

سوزوم اوزوم كيمي دوز، باغلاما يالان ديليمه

ديلين فضيلتي يوخدور ملاك تقوادي

گئد اوز كماليوه گول گولمه اي فلان ديليمه

يقول اكرمكم عند ربّي اتقاكم

قويوب پيمبر اكرم گوزل بيان ديليمه

هميشه امر به معروف دور منيم هدفيم

اگر كومك ليق ائده حيّ لامكان ديليمه

منافقه دئيرم ال گوتور بو تفرقه دن

گولوب محاسينيمه يازما داستان ديليمه

گلين وئره ك ال اله دشمنين قازاق كوكونو

يئتيرمه زهريلي عقرب كيمي زيان ديليمه

كريمي ام ديليمي رايج زامان ائده رم

توجّه ائتسه آقام صاحب الزّمان ديليمه

 استاد كريمي مراغه اي       

گؤنده ر     بؤلوم لر: