ديديم: اي غنچه دهن، كونلومي قان ائيله‌ميسن!
ديدي: «بي‌جا يئره عشقمده فغان ائيله‌ميسن»!
ديديم: انصاف ائيله اينجيتمه مني عاشقينم...
ديدي: «گئت!،سرّيمي دنيايه عيان ائيله‌ميسن»
ديديم: آغلاتما مني سرو بويون شوقينده!
ديدي: «گوز ياشيني بيهوده روان ائيله‌ميسن»
ديديم: آخر گوزليم، باغ و بهاريم سنسن
ديدي: «سن عمريني حسرتله خزان ائيله‌ميسن»
ديديم: آز چكمه‌ميشم گوزلرينين حسرتيني
ديدي: «اؤز كونلوني يئر سيز نگران ائيله‌ميسن»
ديديم: عشقينده اسيرم، منه بس خيري نه‌دير؟
ديدي: «اولده بو سوداده زيان ائيله‌ميسن»
ديديم: عشق آتشي نيلر منه؟ قورخان ده‌گيلم
ديدي: «بيچاره يانارسان! نه گومان ائيله ميسن»؟
ديديم: اي گل! من ازلدن‌ده گوزه‌ل عاشقيم
ديدي: «سن روحيني عشق‌ائيله جوان ائيله‌ميسن»
ديديم: هر گون سر كوي‌ينده دولانماقدر ايشيم
ديدي: «واحد، نه گوزه‌ل يئرده مكان ائيله‌ميسن»
علي آقا واحد
گؤنده ر
بؤلوم لر: